Энэ  парламент тун сонирхолтой дүр зураг бүхий. Гэр хорооллын түшээгээс авахуулаад гудамжны тэмцэгч хүртэл төрд дэвшсэн гээд ёстой л ард түмний төлөөлөл бүрдээ юу гэлтэй. Бараг тал хувь нь шинэковуудаас бүрдсэн энэ парламентын хамгийн хамгийнд анхаарал хандуулна уу.  

Хамгийн дуугүй

МАН-д Сэлэнгэ аймгаас ганц суудал зулгааж ирсэн энэ эрхэм бол Ж.Эрдэнэбат. Ингэж танилцуулахын учир нь түүнийг Сэлэнгийхэнээс өөр хэн ч мэдэхгүй, танихгүй.  

Тэрээр Сэлэнгэ аймгийн засаг ноёноор ажиллаж байгаад өнгөрсөн сонгуулиар ялалт байгуулан төрийн ордонд орж тугандаа мөргөсөн тэр цагаас хойш түмний өмнө битгий хэл сонгосон нутгийнхаа ард түмнийг тоотой эргэсэн эрхэм.  Тиймээс л  Короля гишүүдийн тоонд зүй ёсоор толгой цохих нь ойлгомжтой болоод байгаа.

Хамгийн стиллэг

Тоогоо алдсан харчуудын дунд чимэг нэмэн суудаг бүсгүйчүүдийн хамгийн стиллэг нь УИХ-ын шинэхэн түшээ С.Одонтуяа гэдэг. 50 дөхөж яваа гэхэд гоо үзэсгэлэн, бие галбираа тун ч сайн хадгалсан тэрээр биеэ авч явах соёл, хувцаслах урлаг талдаа хүртэл чамбай, мэдрэмжтэй ханддаг нь анзаарагддаг.

Хамгийн хэрүүлч

“Шударга ёс” эвслийн жагсаалтаар орж ирсэн О.Баасанхүү УИХ-д суугаа шинэхэн гишүүд дундаа хамгийн хэрүүлч басхүү шударга түшээдийн нэг.

Ямар нэгэн намын үзэл бодлыг бусдад тулгаад байддаггүйн дээр үндэслэлтэй хэрүүл хийдэг гэдгээрээ энэ хэргэмийг зүүх нь зүйн хэрэг.

Хамгийн идэвхитэй

Намын даргынхаа төлөө нойр хоолоо хугаслан байж УИХ-д ногоон гэрлээр тухалсан З.Баянсэлэнгэ бусад нөхөд шигээ “хямсганаж” явдаггүй, ил цагаахан нэгэн. Урилга заллага өгсөн л бол арга хэмжээ болгонд оролцож суудаг ивэвхитэй түшээдийн эгнээг тэр тэргүүлж байна.

Өөч нэг нь З.Баянсэлэнгэ хатагтайг “үзээгүй юмаа үзэж, үхэр цам харайна” гэгчээр дуудсан бүхэнд гүйж очлоо хэмээдэг. Гэхдээ ингэж нийгмийн идэвхитэй байх нь ард иргэдээ төлөөлөн суугаа, УИХ-ын гишүүн хэмээх сэтэртнүүдийн хамгийн чухал ажил.

Хамгийн царай муутай

Эрчүүдээс илүүтэй эмэгтэй хүний гоо үзэсгэлэнг хүмүүс анзаарч байдаг. Юу ч өмссөн нэг л өнгө ордоггүй эмэгтэй түшээгээр УИХ дахь албан бус эмэгтэйчүүдийн бүлгийн дарга, УИХ-ын гишүүн Л.Эрдэнэчимэгийг  тодорхойлох юм.

Тэр болгон нүүр амаа будаж, шунхдаад байдаггүй дээр нь эгэл биш эрүү нь түүнийг нугасны муухай дэгдээхэй болгоход хүргэж байна.

Хамгийн эр зоригтой

Оюунтолгой гэрээний асуудлаар олныг байлдан дагуулж, С.Баярцогт гишүүнийг улалзуулсан фенгшүй С.Ганбаатар яах аргагүй хамгийн эр зоригтой нь. МАНАН-гийн засгийн газар мандан бадарч байхад хийгдсэн, ард иргэд яаж ч хичээгээд ойлгохгүй уг гэрээг илчилсэнээрээ тэр эр зоригтон гэдгээ дахин нэг баталж байгаа юм.

Өөр хоорондоо хуйвалдаж, өч төчнөөн жил “булшилж” орхисон эл гэрээг С.Ганбаатар гишүүнээс өөр хэн ч өмнө нь сөхөж байгаагүй. Зөвхөн үүнийх нь төлөө л түүнд алга ташин баяр хүргэмээр байна.

Хамгийн хичээнгүй

Дундговийн ганц өмөг түшиг, “Баяннамсрай” бурхан нь болсон Б.Наранхүү гишүүн төрийн ордонд ирмэгцээ л “Үндсэн хууль”-ийг ширээнийхээ ном болгосон. Бүр чуулган дээр хүртэл хуулиа хичээнгүйлэн судалж байгаа харагддаг. Хүн болгон хууль мэддэг байх албагүй, харин төрийн түшээ мэдэж байх ёстой. Баяннамсрай бурхан маань худлаа мэддэг царайлахын оронд хичээнгүйлэн судалж байгаа нь сайшаалтай.

Хамгийн туйлбаргүй

Биеийн масс хийгээд ажил, амьдралын намтарыг харвал хамгийн “хөнгөн, туйлбаргүй” гишүүнээр Г.Уянгыг нэрлэж болох юм.

Монголын бараг л бүх нам, эвсэл, холбоодтой сүжирч явсан тэрээр анх Ардчилсан намд элсэж улс төрийн карьераа эхлүүлсэн түүхтэй.  Улмаар О.Магнай, Ж.Батзандан нартай нэг хэсэг “романс үүсгэсэн” ч амжилтыг эс  олсон.

Тэгэхээр нь “Ахмад”-ын гэх тодотголтой Г.Баасан авгайг дагаж, гараас нь хөтлөөд тун ч сайхан үеэрхэж байсан цаг саяхан.  Аргаа барахдаа нэг үе “арцалдаж” явсан М.Энхсайхан ахынхаа “хөнжилд шургаж”, улмаар Н.Энхбаяртай нам холбогдсон. Түүгээр ч зогсохгүй түүнийг сүүлийн үед АН-руу татагдаж байгаа гэх мэдээлэл тараад байгаа юм.

Хамгийн хэнэггүй

Энэ парламентад байгаа хамгийн хэнэггүй гишүүний тоонд С.Дэмбэрэл орох учиртай. Тэрээр ИЗНН-аас УИХ-д суусан хоёрхон түшээгийн нэг нь. Угаас хоёрхон гишүүнтэй нам бүлэг байгуулах эрхгүй болохоор тэдний хэлсэн үг, хийсэн үйлдэл бусдын чихэнд хүрдэггүй тал бий.  Тиймээс “би л болж байвал бусад нь яахав” гэсэн шиг суудаг энэ нөхөр хамгийн хэнэггүй түшээ мөнөөсөө мөн.

Хамгийн жиргээчин

Залуусын хамгийн их ордог, хоорондоо мэдээлэл солилцдог  самбар бол “Твиттер” хэмээх интернетийн сүлжээ.

Тэгвэл  Монголын улс төрчдөөс хамгийн идэвхитэй жиргэдэг гишүүдээс дурьдвал УИХ-ын гишүүн Х.Баттулга, Ё.Отгонбаяр, Ерөнхийлөгч Ц.Элбэгдорж нар зүй ёсоор орно. Тэгвэл УИХ-ын шинэхэн гишүүдээс хамгийн өндөрт жиргэдэг нь ноён “MCS”. Эрхэм түшээ Л.Энх-Амгалан чуулганы хуралд суухдаа хүртэл твиттер хуудсаар гуйлган байдгийг ангийн нөхөд нь гэрчлэх биз.

Хамгийн царай муутай

Царай муутай эмэгтэй түшээг нь дуудчихаад эрчүүдийг орхих нь зүйд үл нийцнэ.Олны хэлдэгээр хамгийн царай муутай эрэгтэй гишүүнээр Н.Батцэрэгийг тодруулж болно. Аальгүй гэмээр дүр төрхтэй нь холбоотойгоор ийн тодорхойлсон байх.

Хамгийн тэмцэгч

Төрөлхийн тэмцэгч маркын товарищ бол УИХ-ын гишүүн Ж.Батзандан. Гадаа гудамж, цардмал талбай, төрийн ордон гээд газар голж, шилэхгүй тэмцдэг тэрээр өдгөө ч төрийн эрхтэн дархтны өөдөөс үг сөрдөг үнэнч тэмцэгч. УИХ-ын гишүүн болоод энэ чанараа гээхчих болов уу гэтэл үгүй шүү. Улам л эрчээ авч, эрчлэгдэж, урагшилж байгаа.

Р.Эрдэнэболд