Бизнесийн талбараас улстөр рүү шургалж, өнгөрсөн жилүүдэд охин компаниудынхаа тоог л нэмснээс бус өөр бусдын төлөөнөө олигтой зүйл сэдээгүй Б.Чойжилсүрэн  намынхаа хамгаалалт, нөмөр нөөлөг болоод улстөрийн хор бүхий тохиролцооны шугамаар ямартаа ч өдийг хүртэл хууль тогтоогчдын нэг гэх тодотголыг зүүж яваа. Хоёр сонгууль дараалан сонгогчдод мөнгө тараасан үйлдлээсээ үүдэн УИХ-ын гишүүний суудалд суух ёс зүйтэй эсэх асуудал нь эргэлзээтэй гэдэг нь яригдаж ирсэн ч, хууль ёсны дагуу шийдвэрлэгдэж өгдөггүй Б.Чойжилсүрэн гишүүнтэй холбоотой хуудуутай мэдээлэл татрах янз алга.

 Тэгвэл түүний компани нь ч  хууль зөрчин үйл ажиллагаа явуулж ирсэн байх юм.  Нийслэл дэх  ашигтай байршилтай газруудыг өөрийн болгож дээр нь хууль бусаар барилга байшин барьж дадсан тэрбээр дахиад л мөнөөх үйлдлээ давтаж байна. “Хурд”,  “Рапид харш”, “Апартмент кей эйч хотхон”  “Хүннү” гээд яс чанар муутай хэд хэдэн хорооллыг дур зоргоороо босгосон “Хурд”  компани Баянгол дүүрэгт орших Улаанбаатар зүтгүүрийн депогийн эзэмшлийн газар дээр “Нарны хороолол” гэх тунчиг сүртэй нэртэй хорооллыг бас л дур мэдэн бариад байна. Тус  хороолол холбогдох газруудаас зөвшөөрөл авалгүйгээр Улаанбаатар зүтгүүрийн депогийн эзэмшлийн газар дээр ажлаа эхлүүлсэн байдаг. Өнөөх хяналт энэ тэр тавих ёстой Мэргэжлийн хяналтын газар нь ч гишүүний компанийн барилгын ажлыг зогсоож дийлээгүй өнөөдрийг хүрсэн гэж байна. “Нарны хороолол” гэх нэртэй уг төслийн хүрээнд 25 корпус барилга босч байгаа бөгөөд ажил гүйцэтгэгчдийн олонхи нь хятадууд аж. Хачирхалтай нь, Хурд групп бизнесийн үр ашгийн төлөө хууль зөрчин барьж буй барилгаа зүтгүүрийн депо, төмөр замын ажилчдын орон сууц гэх худлаа тайлбар хийн хаацайлж ирсэн байгаа юм. Мөн тус компанийн луйврын үйл ажиллагааг Монголын барилгачдын холбоо мэдэж байгаа хэрнээ чимээгүй байж ирсэн нь өмгөөлж байгаагийнх нь тод илэрхийлэл гэдгийг эх сурвалж хэлж байна.

Уг нь Хурдкомпанийн энэхүү бусармаг үйл ажиллагааны эсрэг төмөр замчид санаа нийлэн босч, хотын дарга хандсан юм билээ. Гэсэн ч нийслэлийн удирдлага хариу ирүүлэлгүй байсаар хэдийнээ захиалагчид захиалгаа өгсөн гэдэг. Хурдын зүгээс өөрсдийгөө өмгөөлөхдөө барилга барьж байгаа хэсэгт хамаарах төмөр замуудыг ашиглахаа больсон гэх ч, тэдэнд материал хангамжийн бааз байсан барилга, хашаа гээд бүгдийг битүүмжлэн өөрийн болгох эрхийг хэн өгснийг асуумаар байна. Төмөр зам нь стратегийн чухал ач холбогдолтой нь нэгэнт тодорхой. Тэгвэл  Улаанбаатар зүтгүүрийн депогийн эзэмшлийн газар их хэмжээний түлшний агуулах бий. Зөвшөөрөгдсөн стандартыг нь авч үзэхэд түлшний агуулахаас 100 метрт барилга байгууламж барьж болдог бол Хурд компанийн ”Нарны хороолол” төмөр замын түлшний агуулахаас 30 метр зайд баригдсаар байна. Тэгэхээр аюулгүй байдлын хувьд үнэхээр сэрэмж дагуулж байна. Хэдэн жилийн дараа 3200 айлын орон сууц болно гэгдэж байгаа хорооллыг ердийн үед 6 мянган тонн түлш хадгалдаг агуулахын дэргэд барьж, төмөр замд дэндүү ойрхон газрыг нь “Хурд” дээрэмдчихээд байгаагийн ард Б.Чойжилсүрэнгийн нөлөө байгаад эргэлзэх хэрэг байхгүй болов уу. Түүнчлэн ноён түшээ өөрийн бизнесийнхээ төлөө үхэн хатан зүтгэж байгаа бөгөөд хотын төвд түлш, шатахууны агуулах байлгаж болохгүй, хэрэв байгаа бол нүүлгэх шаардлагатай гэсэн зүйлийг хэлж яриад яваа юм байна.

Ер нь тэгээд УИХ-д суугаа гишүүдээс хөрөнгө орлогын хэмжээгээрээ нэгдүгээрт бичигдсэн  Б.Чойжилсүрэнгийн тухайд мөнгөний төлөө ийм увайгүй зүтгэдэг, гарч ирэх гэж мөнгө тараадаг  юм чинь түшээгийн суудалд байх эрхтэй гэдэг нь ч эргэлзээтэй байна.   “Хурд” групп, “Хурд-Хүнс”, “АпартментКейЭйч”, “Хурд ложистик”, “Хурд-Автомотив”, “Хурд-Интернэшнл” Хурд-Авто”, “Хаусинвест”, “Талын шонхор”, “Саудгобикоэлтранс”, “Саудгобиблейкгоул” зэрэг арваад компанийн хувьцааг 100 хувь эзэмшдэг түүний компанийн барьсан   барилга дээр осол гарч хүний амь үрэгдсэн харамсалтай явдлууд ч гарч байсан. Гэвч “Хурд” ерөөсөө хариуцлага хүлээдэггүй.

Э.Болор