УИХ-ын эрхэм гишүүн Х.Баттулга сүүлийн үед “Чухал 100 сэдэв”-ийг үе үехэн хөтөлж харагдах болсон. Гишүүний ажлаасаа илүүтэй телевизийн нэвтрүүлэгт хамаг анхаарлаа хандуулах болсон Х.Баттулгыг цахим ертөнцийн хэрэглэгчид “Женко хөтлөгч болчихвол зүгээр юм бишүү” хэмээн үзэж үзэл бодлоо илэрхийлцгээж  байх юм.  

Үүний хажуугаар "Херо Энтертайнмэнт" студиэс бэлтгэн гаргадаг "Монгол тулгатны 100 эрхэм" нэвтрүүлэгтээ Далай ламыг урьж оролцуулж байгаа бөгөөд хөтлөгчөөр нөгөө л Х.Баттулга, П.Анужин нар байж байх юм. Нэвтрүүлэгт оролцож байгаа Далай лам манай оронд саяхан айлчлаад буцсан Хятадын дарга Си Зиньпинтэй зэрэгцэн айлчлах гэсэн боловч хойшлогдсон.

Далай ламыг Монгол улсад ирэхийг Си Зиньпин бүр хориглосон гэж  шуугиж үнэн худал нь мэдэгдэхгүй байгаа. Үүнийг хөндлөнгөөс харсан твиттерийн идэвхтэй хэрэглэгчид “Энэ нэвтрүүлэг нь хоёр улсын хоорондох найрамдлын харилцаанд сэв суулгаж мэдэх юм гэсэн нэг хэсэг байхад зарим хэсэг нь “Нэг жижиг нэвтрүүлэгт ороо л биз. Энэ нь улс орны энхийн харилцаанд нөлөөлөхгүй” хэмээн үзэл бодлоо илэрхийлцгээж байна.

Мөн “Женко ч асуудлыг томруулж байна даа. Си даргыг айлчилсны дараа нэвтрүүлэгтээ Далай ламыг оруулаад л. Хариуцлагаа өөрөө хүлээх байхаа” гэж байна.  Хамгийн сонирхолтой нь ард түмнийхээ өмнө өндөр хариуцлага үүрсэн эрхэм гишүүн Х.Баттулга үүрэгт ажлаасаа гадуур ажил хийж байгаа нь хэн бүхэнд таалагдахгүй байгаа нь цахим сүлжээн  дэх нөхдүүдийн байр сууриудаас харагдаж байна гэхэд болох юм.

М.Сонор