“Монголын алт” компанийн захирал Б.Нямтайширын хүү Н.Номтойбаяр төрийн сайдаас их хурлын эрхэм түшээ болтлоо өгсчихсөн. Улстөрийн карьераа ийн давшилттай өрнүүлж байгаа түүнийг төр засах хэмжээнд хүрээгүй шавилхан нэгэн гэж харах хандлага үнэндээ нийтлэг. Гэсэн ч тэрээр өөрийнхөө имижийг аль болох энгийн эвтэйхнээр бүрдүүлэх гэж яддаг гэхэд болно. Ямартаа л арван жилээ төгсөөд л 17 настай хүү анх Америкт хөл тавьж, номд шамдахын хажуугаар ажил хийж, мөнгөний үнэ цэнийг гүн гүнзгий мэдэрсэн гэж өөрөө ярьдаг. Бүр  мянга орчим оюутанд үйлчилдэг хоолны газарт гурван сар угаагч хийхдээ өөрөө хөдөлмөрлөж олсон мөнгөний амтыг илүүтэй мэдэрсэн хэмээн ярьдаг ч, түүнийг мэдэх хүмүүсийн хувьд Н.Номтойбаяр худлаа  ярьж байна гэлцэх юм билээ.