Саяхан гутал засдаг хүнийг гуталчин, талх хийдэг хүнийг талхчин гэж нэрлэдэг юм чинь архи үйлдвэрлэдэг хүмүүсийг архичин гэж нэрлэе гэсэн “оновчтой мэргэн” санаачлага гарч байсан. Тэгвэл тамхи л яриад байдаг Л.Эрдэнэчимэг гишүүнийг тамхичин ч гэж нэрлэж болмоор юм шиг. Хэдийгээр тамхи татахыг хориглосон газрыг заасан мөртлөө, татаж болох газрыг нь “устгасан”, тамхичинтай биш тамхи татах боломжтой баар цэнгээний газруудтай дайн зарласан гэсэн шүүмжлэл  зөндөө сонссон ч Л.Эрдэнэчимэг гандан буурсангүй, тамхиа л ярьсаар явна. Ерөнхийлөгчийн дэргэдэх Иргэний танхимд өчигдөр болсон “Татварыг нэмэгдүүлэх замаар тамхины хэрэглээг бууруулах боломж” хэлэлцүүлэгт татвар нэмчихвэл тамхидалт 10 хувь буурна гээд гүйж явсан сурагтай.

Хэрэвзээ Засгийн газар тамхинд ногдуулж буй татварыг нэмэх санал оруулж ирэхгүй бол УИХ-ын гишүүдтэй хамтран хуулийн төсөл санаачилж НӨАТ-т өөрчлөлт оруулах байдлаар тамхины татварыг нэмэгдүүлнэ гэсэн санаачлага гаргаж байгаа гэсэн шүү.

А.АНАНД