Хэдэр хатуу үгтэйгээрээ хэзээнээсээ алдартай УИХ-ын гишүүн Ц.Нямдорж сүүлийн хэд хоногт нэлээд цамналттай байна. Насаараа хууль зүйн салбарт ажилласан, хуулийг хаана ч засна гэдэг Ц.Нямдорж хэзээнээсээ таарамжгүй нохой, гөлөгтөө хүрч хэрэлдэж байдаг, уг нь бол өөрийнх нь халааг авсан Хууль зүйн сайд Х.Тэмүүжинг шинэ хуулийн төслөө “тэврээд” орж ирэхэд нь багагүй баалсан.

Түүнээс өмнөхөн мөн л солонгосчуудтай нууц гэрээ байгуулсан гэж хэлээд шүүх цагдаадаа тулж байсан Женко Х.Баттулгыг Үйлдвэр, хөдөө аж ахуйн сайдаас огцруулах асуудлыг нь шийдэх үеэр “Ажлаа хийхгүй “Баянгол” зочид буудалдаа очоод хэвтчихдэг, угаасаа л муу хүн шт” гэхчилэн баахан муу үг шидэлж, хариугаа авав.

Харин төсвийн тодотгол хэлэлцэх байсан ч ирц хүрээгүйн улмаас хойшилсон өчигдрийн чуулганы хуралдаан дээр намаас нь гарч Ардчилсан намд элссэн Д.Арвин гишүүн Ц.Нямдоржийн бай болов.

Төсвийн тодотголд Баянзүрх дүүрэгт хүнсний худалдааны төв байгуулахад зориулж улсын төсвөөс хөрөнгө гаргахаар санал гаргасныг УИХ-ын гишүүн Ц.Нямдорж буруутгаж, Баянзүрх дүүрэг бусдаасаа хамгийн олон захтай. “Дүнжингарав” нэртэй цэлийсэн том худалдааны төв, наана нь УИХ-ын гишүүн асан Ш.Сайхансамбуугийн “Наран туул” худалдааны төв, “Да хүрээ” техникийн зах, Арслантай гүүрийн хажууханд “Баянзүрх” хүнсний зах, “Боса” гээд өдий төдий худалдааны төв, зах байхад төсвийн хөрөнгийг барж ядаж байгаа юм шиг хүнсний төв барихад зарцуулах нь зохисгүй. Түүнийг өөр зүйлд зарцуулах ёстой. Ер нь тэгээд Д.Арвин чиний Ардчилсан нам руу гүйж орсон чинь эмнэлгийн барилгаас болж мөнгө төгрөгийн асуудалд орооцолдоод аргагүйн эрхэнд орсон хэрэг”  гэж баахан зандрав.

УИХ-ын өнөөдрийн чуулганаар төсвийн тодотголыг үргэлжлүүлэн хэлэлцэнэ. Харин Ц.Нямдорж хэн рүү агсрах бол?

А.АНУ