Товлосон ёсоор өчигдрийн УИХ-ын чуулганаар сайдаасаа огцрох хүсэлт гаргасан Х.Баттулгын давхар дээлийг тайлж, хүсэлтийг ёсоор болгов. Үүний араас түүний сайдын суудлын орыг хэн залгах талаар мундаг, мундаг таамаглалууд гарч эхлэх нь тодорхой.

Сүүлийн нэг сарын турш яригдсан нөгөө нэг огцруулах эсэх тухай асуудал болох Х.Тэмүүжинг Хууль зүйн сайдын суудлаас буулгах эсэх тухайд ч мөн Ардчилсан намынхан олонхоороо хамгаалаад үлдээх нь тодорхой гэгдэж байсан ч анх санаачлага  гаргасан нь О.Баасанхүү өөрөө саналаа буцааснаар хэл амны бай болов. Буцаах л байсан юм бол анхнаасаа яах гэж санал гаргасан юм бэ гэсэн эхний гайхашралаас эхлээд Х.Тэмүүжин О.Баасанхүүгийн амыг хаачихлаа, О.Баасанхүү Солонгост байгаа “Намбар ван”-тай уулзаж чиглэл аваад саналаа буцаав гэсэн олон таамгууд явж байна.

О.Баасанхүү ч үнэхээр намын дарга нь биеэ тэнхрүүлж буй Солонгос улс руу мордоод уржигдархан ирсэн аж. Өөрөө бол хувийн асуудлаар, эмчилгээ хийлгэх гэж явсан гэж тайлбарлаж. Басхүү МАХН-ын дарга Н.Энхбаяртай уулзсанаа ч үгүйсгэсэнгүй. Х.Тэмүүжингийн асуудлаар Н.Энхбаяр:

- Х.Тэмүүжинг өмөөрөхгүй гэсэн. Энэ хүн Ардчилсан намдаа ч их гай тарьсан гээд түүх ярьж байна лээ. “Эх орон-Ардчилал эвсэл”-ийг Ц.Мөнх-Оргил, Х.Тэмүүжин хоёр задалсан тухай ярьсан гэсэн үг алдсан байх юм.

Х.Тэмүүжин ч “овоо л гар” юм байна. 2004-2008 онд засгийн эрх барьж байсан “Эх орон-Ардчилал эвсэл” тараагаад хаячихсан нөхөр болж таарч байна.

Ийнхүү будилаан, самраан, буцаалт, үдэлттэй улстөрийн нэг долоо хоног өндөрлөж байна. Араас нь бас Эдийн засгийн хөгжлийн сайд “Фортуна” хэмээх Н.Батбаярыг сайдаас огцруулах чиглэлийг Үндэсний аюулгүй байдлын зөвлөлөөс өгсөн гэх бор шувуу нисэлдэж эхэллээ. Ирэх долоо хоногуудад Н.Алтанхуягийн Засгийн газар бас л хэл аманд ээрэгдээстэй байх бололтой дог шүү.

А.АНУ