УИХ-ын гишүүн мөртөө давхар сайдаар ажилладаг 17 гишүүний давхар дээлийг тайлуулах хуулийн төслийг УИХ өчигдөр хэлэлцээд “унагаж“орхисон.

Олон ч сар яригдаж, бараг л УИХ-ын гишүүдийн ганц л хэлэлцдэг санаа тавьдаг асуудал нь мэт болоод байсан энэхүү хуулийн төслийг эцсийн мөчид ийнхүү унагаж орхиход УИХ-ын дарга З.Энхболд хүртэл гайхаж ”УИХ-ын түүхэнд байнгын хороогоор дэмжигдсэн төсөл ингэж олонхийн саналаар унаж байсан тохиолдол үгүй” гэж гайхаширч байсан.

Ингээд сайд нарыг хуулийн дагуу давхар дээлийг нь тайлуулах гээд бараагүй атал  Үйлдвэр, хөдөө аж ахуйн сайд Х.Баттулга сайн дураараа сайдаас огцрох өргөдлөө өглөө.

Тэрээр намынх нь нөхөд нь давхар дээл тайлах төслийг хуйгаараа эсэргүүцсэнийг ийн эсэргүүцэж, өөрөө үлгэр дууриалал үзүүлж байгаа бололтой.

Хууль зүйн сайд Х.Тэмүүжинг огцруулахыг ч мань хүн хоёр гараа өргөн дэмжиж байсан.

Түүний энэхүү эр зоригийг шазруун зантайгийнх нь бас нэг илэрхийлэл ч гэж хэлж болох мэт. Өөрөө огцрох өргөдөл гаргаж байгаа хүнийг “ангийн”-х нь найзууд гар өргөж батлаад л сайдын суудлаас нь салгаад өгөх байлгүй дээ.

А.АНУ