Ерөнхийлөгч Ц.Элбэгдорж өнгөрсөн сарын дундуур Японд эмчлүүлэхээр явсан.

Бүхэл бүтэн улсын Ерөнхийлөгч гадаадад эмчилгээ хийлгэнэ гэж байгаа нь улсын маань эмнэлэг ямархуу байгааг харуулж байна гэсэн шүүмжлэлийг PR-даа дэндүү эвлэг Ерөнхийлөгч өмнө нь эмчилгээ хийлгэх шаардлагатай гэж байсан ч яалт ч үгүй гадаад руу явахаас өөр аргагүй юм байна гэж эвтэйхэн аргалсан.

Бүр чимээгүйхэн гадаад явчихвал хэзээний урт чихтэнгүүд ямар нэгэн аргаар мэдчихээд бөөн сенсаци болгоно, албан мэдээгээр мэдээлчихвэл бөөн шүүмжлэл дэгдээнэ гэсэндээ гадаадад эмчилгээ хийлгээд ирсэн сэтгүүлч Т.Эрдэнэцогтыг хүлээж авч уулзангаа “Ахынх нь ч гэсэн нуруу өвдөөд өө, гадагшаа явахаас өөр аргагүй юм байна” гэж гэнэ сэрэггүй мэт зовлон ярих мэт цайруулж чадсан.

Тэгвэл нуруунгаа эмчлүүлсэн Ерөнхийлөгч Ээбээ удахгүй эх орондоо ирнэ гэсэн мэдээлэл тархаад байна. Гэхдээ бас л нэг ойлгомжгүй мэдээлэл тархсан нь тэрээр Зүүн өмнөд Азийн орнуудаар айлчилж яваа АНУ-ын Ерөнхийлөгч Барак Обаматай Токиод уулзахаар эх орондоо ирэхээ түр хойшлуулсан гэх.

Түүнийг Гадаад бодлогын зөвлөхөө Японд яаралтай ирэхийг дуудуулсан гэх мэдээллээс ийнхүү Барак Обаматай уулзалт хийх нь гэсэн таамаг дэгджээ.

Гэхдээ ямартаа ч Ерөнхийлөгч Ээбээ маань Японд зүгээр л нэг өөрийгөө эмчлүүлээд ирсэнгүй, Японы Ерөнхий сайд Абетэй үдийн цай уунгаа ажил хэрэгч яриа хөөрөө өрнүүлж, эгэл жирийн ард түмнээ өөр шигээ өвдөхдөө Япон руу зориулахгүйн тулд 200 ортой эмнэлэг байгуулах талаар ярилцаад иржээ.

А.АНУ