Эрхэлсэн тодорхой ажилгүй гэдэг шиг УИХ ангид тогтсон тойроггүй хэсэг нөхдүүд бий.

Ёстой сохор азаар жагсаалтаар парламентад хөл тавьсан тэдэнд наад зах нь тойрогтоо очиж ажиллах, сонгогчдын итгэлийг алдахгүй байх мэтийн “дарамт” байхгүй. Тэр утгаараа зав нь ихэддэг юмуу, зарим нэг нөхөд “бөгс ухалт”-аар дагнах болсон. 

Өсөх ирээдүйтэй насандаа нэг салбарт мөр зэрэгцэн алхаж явсан О.Баасанхүү, Х.Тэмүүжин нарын хооронд нэгэн сериал явагдаж эхэлсээр багагүй хугацаа өнгөрлөө. Тэр олон сайд дундаас өөрт нь арай ойр байж мэдэх хуульч сайдын галстукнаас чаргууцалдах нь халаг яваа О.Баасанхүү гишүүн нэг заргалдвал эцсийг нь үзэхээс нааш амрахгүй нь бололтой. 

Бидэнд нэг ийм л баатар дутаад байлаа. Муу юманд урд гараад гүйчихдэг, хэлмээр байсан ч хэлээ хазаад, арьсаа хамгаалаад дуугарч чадахгүй байгаа асуудлыг ичиж айлгүй хэлчихдэг яг ийм баатар. Тэр цагаа олж гарч ирэв. 
Гэвч “баас баригчид” хэзээний нэр муутай. “Энэний нэр нь хүртэл Баасан хүү” гэж ёжлох хүмүүс ч байна.

Цагтаа Л.Гүндалай, Ц.Нямдорж хоёрын хэрхэн хөлөө жийлцэхийг харах гэж чуулганы тоймыг жүжиг аятай шимтэн үздэг байсан сан. Цаг үе болгон өөр өөрийн сайн муу талын баатруудтай. 
О.Баасанхүүг “Жагсаалтын алдаа минь байрандаа очооч” гэж доош нь хийсэн ч тэр гандан буурахгүй “тууж” явна. Мэдээж нормаль хүн улс төр хийхгүй, чадахгүй ч үгүй. Харин не-нормальны хүнд энэ тун зохимжтой салбар.

Экс Н.Энхбаяртай үзэлцсээр байгаад суга дэвшсэн Г.Баасан “бабушка”, сайдын эсрэг бичиг сачиг барьж гүйсэн О.Баасанхүү хоёрын шийдэх арга барил, тактик ойролцоо ч юм шиг. 

Улс төрд “баас” үндэстэй нэртэй хүн ойрын хэдэн жил ингэтэл дуулиан дэгдээсэн удаагүй. Магадгүй хэдэн жилийн дараа энэ нэр улс төрд хит болох ч юм билүү. Гол нь нэг номерын хүнтэй тэмцэлдсэн хэнбугай ч дээшээ татагдана. 
“Баасанхүү” синдром үргэлжилж байна. 

А.Энхлэн.