Орон нутгийн ИТХ-ын сонгуульд ардчилсан намынхан “хавтгай” ялсан хэмээх үгийг Ерөнхий сайд Н.Алтанхуяг байн байн давтан баярлаж сууна. Хавтгай ялна гэж яадаг ч юм, бүү мэд. Ёстой нөгөө “үзээгүй юм аа үзэж үхэр цам харайна” гээч болж байгаа бололтой. Хоёр сонгуульд ялалт байгуулсан хүмүүс ингэж “мундаг”-лахаас ч яахав. Ямартаа ч эцсийн дүн хараахан гараагүй байгаа ч АН олонхи болсон нь нэгэнт тодорхой байгаа. Тэгэхээр олуулаа бус олонхоороо төр барих болж байна.  Өмнө нь “бөөнөөрөө” төр барьж байсан Ардын намын алдаа эндэгдэл өдгөө ч “булшлагдаж” амжаагүй байгаа гэдгийг юу юунаас эрхэмд үзэх нь хэрэгтэй болов уу. Дөнгөж сая МАН-ынхан хэвлэлийн бага хурал зарлаж өөрсдийн байр сууриа илэрхийлсэн нь бас сонирхол татлаа. Энэ үеэр Ө.Энхтүвшин дарга  “Ардчилсан нам 14 аймагт ялалт байгууллаа гэж мэдэгдэж байна. Энэ дүн яаж гарсныг мэдэхгүй. Нийслэлд нийт 357 хэсэг байгаагаас 186-д сонгогчийн ирц хүрсэнгүй. Тиймээс дахин санал хураалт явагдах нь тодорхой боллоо. СЕХ өдийд урьдчилсан байдлаар дүнгээ хэлэх ёстой. Гэтэл өнөөдөр хүртэл дүнгээ гаргаж чадахгүй байна. Машин ашигласан үр дүн харагдсангүй. Энэ бүхэн анхаарал их татаж байна” гэсэн. Үнэхээр анхаарал татахгүй гээд яах билээ. Анх удаагаа автомат машинаар тооллого явуулж байгаа болохоор. Урьд өмнөх сонгуулийн дүн тэр шөнөдөө багтаад гардаг байсныг хүн бүр мэднэ. УИХ-ын сонгууль ч тэр мөн их хүлээлгэсэн дээ. Одоо бас  л тэр “автомат” гэх тодотголтой машин нь хүлээлгэсээр байна. Энэ хооронд юу эсийг амжуулахав.  Хамгийн хачирхалтай нь яагаад ийм удаан хүлээлгэнэ вэ?  Арай “автомат авилгалч” биш байгаа гэх бодол өөрийн эрхгүй төрсөнийг нуух юун. Юутай ч олон үгийг үл нуршаад олонхи болсон хараацайнууддаа амжилт хүсье. Ардчилсан нам 1996 оноос хойш анх удаагаа ардчилалыг Монголд цэцэглүүлэх боломжоо авлаа.  Монголын ард түмэн ардчилсан сонголтоо бататгаж, АН-д ихээхэн итгэл найдвар хүлээлгэсэн болохоор авилгалаас ангид байж ард түмнийхээ төлөө ардчилсан төрийн ёсоор ажиллана гэдэгт итгэж байна.

Манай сайт танд таалагдаж байвал LIKE хийгээрэй. Танд баярлалаа.