Монгол Улсын ерөнхийлөгчөөр анх улс төрийн тавцанд хөтлүүлэн гарч улмаар “Монголын улс төрд мод тарина” хэмээн үй зайгүй рекламдсаар Чингэлтэй дүүргийн ард иргэдийг сэнхрүүлсэн энэ эрхмийн хэлсэн уг, уриаг хүн бүр мэдэж байгаа. Бүр сонгуулийн өмнөхөн “Хүрлээ, Цогоо гуай” хоёр аймар тунхагласаныг нь сонсоогүй хүн гэж байхгүй байлгүй. Тэгэхээр түүний амлалт хэр биелэсэн юм бол оо. Чингэлтэйн зарим нэг иргэдээс асууж үзлээ л дээ. Мань хүн бокс тоглосондоо ичээд тэр үү, юу ч хийж амжаагүй болоод тэр үү тойргоо эргэж хараахан чадаагүй яваа гэнэ лээ. Үнэхээр ч Г.Баярсайхан гишүүний тарьсан мод гээд үзүүлэх юм ургаагүй байгаа. Зунжингаа, намаржингаа л шороо тоос бослоо шүү дээ тэр Чингэлтэйд нь. Тарина гэсэн модноос хэд нь ургасныг Чингэлтэйхэн төдийгүй нийслэлчүүд  дүгнэж байгаа байх. Нийслэлийнхэнд ногоон мод цэвэр агаар шиг хэрэгтэй бас улстөрд эрүүл агаар оруулах нь түүнээс дутахааргүй чухал гэж тэр хэлж байсан нь үнэн. Тиймдээ ч Чингэлтэйхэн түүнд  хоёр дахь удаагаа итгэл хүлээлгэн сонгоод байгааг нэг сануулах хэрэгтэй биз ээ. Сонгогдоод удаагүй байгаа хүнээс юу нэхээд байна аа гэж бодох нэгэн байх болов уу. Энэ амлалт, уриагаа аль 2008 онд хэлсэн болохоор л. Өдгөө тав дахь жилийнхээ нүүрийг үзэх гэж байгаа “моднууд”. Ямартаа ч “мод хугалах нь бүү хэл, хамгаалах ёстой гэж сургадаг байсан” хэмээн өөрийгөө өөхшүүлэх эрхэм гишүүн маань Монголын улс төрд мод тариад “ногооруулчихгүй” юм аа гэхэд өөрийн өрөө, тасалгаандаа эрх биш ганц нэг цэцэг ч болтугай ургуулж буй гэдэгт найдая.