Барилгын салбарт дараалан гарсан ослууд хэд хэдэн хүний амь насыг авсан нь барилга дээрх хөдөлмөрийн аюулгүй ажиллагаа, техник технологийн чанар стандарт алдагдсанаас болсон. Үүнтэй холбогдуулан УИХ-ын дарга захирамж гаргаж, УИХ-аас Барилгын тухай, хөдөлмөрийн аюулгүй байдал, эрүүл ахуйн тухай хуулинд болон бусад хууль тогтоомжийн биелэлтийг шалгах ажлын хэсэг байгуулагдсан билээ. Ажлын хэсэгт багтсан гишүүд шалгалт хийж, дүгнэлт гарган танилцуулж байгаа билээ. Харин өнөөдөр уг ажлын хэсгийн гишүүн О. Баасанхүү нийслэлийн Нэгдүгээр сургуулийн замын урд баригдаж буй барилгад шалгалт хийж байгаа аж. Уг барилга нь Ерөнхий боловсролын сургуулийн ойролцоо баригдаж буй болохоор хүүхдийн сурах орчинг аюултай болгож байгаа эсэх дээр гол анхаарлаа хандуулан шалгана гэлээ.