Гурван өдөр үргэлжилсэн шүүх хурал өчигдөр 22.30 цагт шийдвэрээ гаргаж, Ерөнхийлөгч  асан Н.Энхбаярт дөрвөн жил хорих ял оноолоо. Сүхбаатар дүүргийн шүүх 19.55 цагт завсарлаж, шүүгч нар гурван цаг зөвлөлдсөний эцэст дараах шийдвэрийг гаргасан байна. шүүгдэгч Н.Энхбаяр нь МИАТ ХК-д БНСУ-аас үнэ төлбөргүй ачаа тээвэрлүүлж, 30 сая төгрөгийн хохирол учруулсан үйлдэл нь нотлогдоогүй тул хэрэгсэхгүй болгохоор шийдвэрлэв. Мөн шүүгдэгч Ж.Мягмаржаргал нь Дарханы төмөрлөгийн үйлдвэрээс ган бөмбөлөгийн гэрээ хийж эд хөрөнгө завшсан үйлдлийг хэрэгсэхгүй болголоо. Н.Энхбаяр, Д.Дуламсүрэнтэй бүлэглэн “Өргөө” зочид буудал, Д.Чулуунбаатартай хамтран “Улаанбаатар таймс” сониныг хууль бусаар хувьчилж авсан үйлдэл нь тогтоогдсон. Үүнээс гадна ТВ-9 телевизийн тоног төхөөрөмжийг завшсан. Мөн Ж.Мягмаржаргалыг “Эрдэнэт” үйлдвэрээс эд хөрөнгө завшсан үйлдэл нь хавтас хэрэгт авсан бичгийн нотлох баримт болон гэрчүүдийн мэдүүлгээр тогтоогдсон гэж шүүх үзэв. Ингээд шүүгдэгч, Ерөнхийлөгч асан Н.Энхбаярт дээрх эд хөрөнгийг завшсан үйлдэл нь 25 сая төгрөгийн хөрөнгө хурааж, долоон жил хорих ял оноов. Мөн эрх мэдлээ урвуулсан үйлдэл нь төрийн албанд хоёр жил ажиллах эрхийг хасаж, мөн хугацаагаар хорих ял ногдууллаа. Д.Дуламсүрэнд 10 сая төгрөгийн хөрөнгө хураах ял оноож, зургаан жил хорих ял оноосон бол Д.Чулуунбаатарт мөн хэмжээний хөрөнгө хураан, 5.1 жил хорих ял ногдууллаа.
Ж.Мягмаржаргалд 25 сая төгрөгийн хөрөнгө хурааж, зургаан жил, мөрийтэй тоглоом тоголсон үйлдэлд нэг жилийн хорих ял оноов. Ногдуулсан ялын хөнгөний хүндэд нь багтаах шийдвэр гаргасан бөгөөд 2009 онд УИХ-аас баталсан Өршөөл үзүүлэх тухай хуулийн дагуу тус бүрээс нь гурван жилийн ялыг хасаж, Н.Энхбаярт дөрөв, Д.Чулуунбаатарт 2.1, Ж.Мягмаржаргалд 3.6 жил хорих ялыг жирийн дэглэмтэй хорих ангид эдлүүлэхээр боллоо.
Харин ТВ-9 телевизийг хурааж, улсын орлого болгох, Н.Энхбаяраас 54 сая төгрөг гаргуулж, Гандантэгчэнлин хийдэд олгох, Н.Энхбаяр, Ж.Мягмаржаргалын “Лексус-470” машин, Н.Энхбаярын  ХААН банкны .... тоот дансан дахь 89 мянган ам.долларыг хохиролд тооцохоор болсон юм.
Шүүхийн энэ шийдвэрийг МАХН-ынхан эсэргүүцэж, СҮхбаатар дүүргийн шүүхийн гадна цуглаан зохион байгуулсан бол, өмгөөлөгч, УИХ-ын зарим гишүүд энэ бол хэлмэгдүүлэлт, бид цаашид давж заалдах болно гэж мэдэгдлээ.

Манай сайт танд таалагдаж байвал LIKE хийгээрэй. Танд баярлалаа.