Саяхан УИХ-ын гишүүн асан Ж.Сүхбаатар МАН-ын удирдлагууддаа шаардлага хүргүүлж мөн түүний дараагаар МАН-ын залуу гишүүд хамтран бас нэг шаардлага маягийн юм хүргүүлж байсныг бид тухайн үед нь мэдээллэж байсан билээ. Тэгвэл энэ удаа УИХ-ын экс гишүүн, МАН-ын бага хурлын гишүүн Ж.Сүхбаатарын шаардлагыг бүрэн эхээр нь хүргэж байна. Ямартаа ч улс төрийн ууган нам МАН өнгөрсөн сонгуульд ялагдал хүлээсэн нь түүний удирдлагуудтай холбоотой гэх хүмүүс олон бий юм.  
Монгол Ардын Намын Бага хурлын гишүүн Ж.Сүхбаатар миний бие Монгол Ардын Намын удирдлагад дараах шаардлагыг тавьж байна. Үүнд:

1. УИХ-ын болон Нийслэлийн ИТХ-ын 2012 оны сонгуульд манай нам сонгогчдын олонхийн итгэл дэмжлэгийг хүлээж чадсангүй.

Хариуцлага, эв нэгдэл, шударга ёсны зарчмыг баримтлаж ирсэн улс төрийн ууган хүчний хувьд энэ үйл явдалд цаг алдалгүй улс төрийн бодит дүгнэлт хийх ёстой гэж намын жирийн гишүүний хувьд, Бага хурлын гишүүнийхээ хувьд үзэж байна. Үүнийг олон түмэн, түүний дотор намын гишүүд, дэмжигчид хуваалцаж байгаа нь тодорхой.

2. Монгол Ардын Нам бол Монгол Улсын тусгаар тогтнол, эрх чөлөө, шударга ёс, эв нэгдэл, үндэсний язгуур эрх ашгийг эрхэмлэн дээдэлсээр ирсэн нийгмийн ардчиллын үзэл баримтлалыг үйл хэргээрээ харуулж байгаа ард түмнийхээ жаргал, зовлонтой ямагт хамт байж ирсэн нам. Намынхаа XXVI Их хурлаар баталсан Хичээн эрмэлзэх зүйлийг цаашид тууштай хэрэгжүүлж, улс орондоо монголчуудаа сайхан амьдруулах эрхэм зорилгынхоо төлөө улам бүр нягтарч эе эвийг эрхэмлэн, сонгуулийн үр дүнд урам хугарсан, тодорхойгүй урагшгүй байдлаас түргэн ангижирч, намын доторх алдаа дутагдал, шүүмжлэлтэй асуудлуудад эрүүл саруулаар хандаж, улс төрийн оновчтой шийдвэрүүдийг гарган шийдэмгий ажиллахыг Намын удирдлага, Удирдах зөвлөлөөс шаардаж байна.

3. Намын дүрмийн хүрээнд улс төрийн соёлтойгоор хариуцлага хүлээхийг Намын удирдлагад уриалж байна. Хариуцлага тооцох, тооцуулах тухай шаардуулдаг бус  хариуцлагаа ухамсарлан үлгэрлэж шинэ цаг үеийн зөв жишгийг Намын дотоод амьдралд тогтооход одоогийн Намын удирдлагын үүрэг нэн чухал байгааг сануулж хэлье. Намаа хүчгүйдүүлэх гэсэн аливаа сонирхлоос ангид байж намын дотоод ардчилалыг гүнзгийрүүлэн намынхаа эгэл жирийн гишүүдийн итгэл, урам зоригийг сэргээж, ард түмний  олонхий дэмжлэгийг эргүүлэн олж авах нь бидний тулгамдсан зорилт болж байна.   

4. Сонгуулийн үр дүнгээр намын маань мянга мянган гишүүдийн эрх ашиг хөндөгдөж, басхүү орон нутгийн сонгууль хаяанд ирсэн энэ цаг үе биднээс нэг нь нийтийн төлөө, нийт нь нэгнийхээ төлөө байж, шинэлэг арга хэлбэрээр дараа дараачийн улс төрийн сонгуулиудад зангидсан гар шиг оролцож ард түмнийхээ итгэл сэтгэлийг  хураахын  төлөө хамтдаа зүтгэж амжилт гаргая.

5. Шинэчлэл шинэ боломж гаргадаг, шинэ боломж шинэ итгэл найдвар төрүүлдэг, шинэ удирдлага зөв бодлогоор шинэчлэлийг тууштай явуулж чадвал олон түмний дэмжлэгийг хүлээж сонгуульд хамтдаа ялалт байгуулдагийг санан Намын дүрмийн дагуу тус намын Бага, Их хурлуудыг яаралтай зарлан орон нутгийн сонгуулиас өмнө энэ оны 9 дүгээр сарын эхний долоо хоногт багтаан хуралдуулахыг Намын удирдах бүрэлдэхүүнээс шаардаж байна.
Монгол Ардын Намын шинэчлэл өөдөө босоо байг.

Та бүхнийг хүндэтгэсэн, журмын нөхөр Жамъянхорлоогийн Сүхбаатар

Манай сайт танд таалагдаж байвал LIKE хийгээрэй. Танд баярлалаа.