УИХ-ын сонгууль болох гээд хаа сайгүй нэр дэвшигчдийн мөрийн хөтөлбөрөөр бялхаж буй. Гудамжны самбаруудаас эхлээд л хашаа хайс бүхэн дээр шахуу Их хуралд горилогчдын зураг хөрөг, элдэв амлалт энэ тэрээр дүүрсэн зурваснууд хадаастай. Шүүр барьсан өвгөнөөс эхлээд л шүлэг бичиж яруу найраг унших нь халаг, цаадуул чинь ёстой нөгөө нэг тэнэгтэхийн дээдийг тэр чигт нь мэдрүүлж яваа гэнэ. Нэрээ уриандаа ашигладаг сонин содон бас сайхан “моод” Монголоор нэг тараадхав. Мандатаа авахаас эхлээд л, мөрийн хөтөлбөр, уриа, ухуулга материал гээд л ямар хэв маяг, загвараар гаргах уу гэж бүр толгойгоо гашилган байж мань аваргуудын эцсийн шийд ердөө энэ бололтой. Нэрээ уриандаа мөнхөлсөн эрхмүүдийн сүржин, сүржин үг хэллэгүүд хаа сайгүй хадаастай. Тухайлбал Нийслэлийн Баянгол дүүрэгт нэр дэвшиж буй хөөрхөн уриатай хоёр бүсгүй байна аа. МАН-аас нэр дэвшиж мандуулсан Л.Амгалан хэмээх царайлаг хатагтай “Иргэн амгалан, нийгэм амгалан” уриаг тунхагласан бол би яаж зүгэр байхав гэсэн шиг ИХН-аас өрсөлдөж байгаа нэгэн сураггүй аниа буюу Д.Үүрцайх “Улс төрд үүр цайлгана”  гэж ирээд л тахианаас түрүүлж донгодож байгаа сурагтай. Уг нь ийм төрлийн арга, тактик амжилтанд хүрч байсан удаа байдаг л даа.  Есөн оны нөхөн сонгуулиар Д.Зоригт сайдтан нэр дэвшихдээ “Зоригтой зүтгэж, зоригтой шийднэ” гэсэн уриа дэвшүүлээд УИХ-д лаглайтал сууж байсан түүхтэй. Гэхдээ энэ хоёр эмэгтэйгийн хувьд ийн хоцрогдсон арга ашиглаад амжилт үзүүлэх нь юу л бол улам нэр хүндээ алдаж бүр хүүхэд нохойн доог болвол яана.

Манай сайт танд таалагдаж байвал LIKE хийгээрэй. Танд баярлалаа.