Бид Монголын улс төрийн эрхэм салбадайнуудыг цувралаар танилцуулж байгаа билээ. Энэ удаагийн салбадай бол “Монос” Л.Эрдэнэчимэг хэмээх энэ бүсгүй.
Монголын эм ханган нийлүүлэх бизнесийн бараг ихэнх хувийг атгадаг “Монос” хэмээх групп байгуулагдаад удаж буй. Доктор Л.Хүрэлбаатарын үүсгэн байгуулсан тус групп салбартаа олон ч охин компанитай, үйл ажиллагааны цар хүрээ өргөн компани. Монголын анагаах ухааны салбарт хийсэн ажил, хэлэх үгтэй ноён Л.Хүрэлбаатар группийнхээ нэгээхэн хэсгийг төрсөн дүү Л.Эрдэнэчимэгтээ даатгаж өгсөн нь голцуу гоо сайхны бүтээгдэхүүн оруулж ирдэг “Монос” эмийн сангийн салбарууд. Эмч мэргэжилтэй Л.Эрдэнэчимэг бүсгүй бизнесээ ч гайгүй сайн авч явдаг. Угаас эмийн бизнес гэдэг нэг л суурийг нь тавьчихвал урсгалаараа явчихдаг ашиг ихтэй бизнес учраас учиргүй санаа тавиад байх шаардлага ч байдаггүй биз ээ.

Өнгөрсөн сонгуулийн алиа салбадайнуудын нэг нь чухамдаа “Монос”-ын Л.Эрдэнэчимэг хатагтай байсан юм. Алс баруун хязгаар Ховд нутгийн уугуул атлаа хаа холын Сүхбаатар аймагт тэр нэр дэвшсэн. Их ч эрт сонгуулийн пиараа эхлүүлж, гэрээ мартатлаа Дарьгангын шаргал талд гандатлаа эцэж цуцалгүй явсан гэдэг. “Монос”-ын Л.Эрдэнэчимэг Сүхбаатарын дайралдсан айл бүртээ хөөрөг зөрүүлж, архи ууж, мөнгө тарааж явна хэмээх бор шувуу нисэлдэж л явсан билээ. Угаас ах намд элэгтэй, улаан өнгөнд нугасгүй Сүхбаатарчууд хүний нутгийн хэн ч танихгүй шавилхан шар бүсгүйд саналаа өгнө гэж юу байхав. Үүнийг тооцоолсон мэт АН “Монос”-ын хатагтайг харь хамаагүй Сүхбаатар луу цөлөө биз ээ. Өвдөг шороодсондоо цөхрөөгүй хатагтай Л.Эрдэнэчимэг ирэх сонгуульд тоосоо өргөнө гэчихсэн гудийх ч үгүй яваа гэсэн. Мөнгөтэй хүн лаагаа ч иднэ үү, луувангаа ч иднэ үү, маньд хамаагүй гэдэг ч тэр их мөнгө улс төрд байх ёстой хэн нэгэнд тухайлбал АН-ын төмөр хатагтай Б.Дэлгэрмаад байсан ч болоосой гэх бодол төрдгийг нуух юун.  

Манай сайт танд таалагдаж байвал LIKE хийгээрэй. Танд баярлалаа.