Монголын Үндэсний бөхийн холбооны VIII “Их Эе” өчигдөр Бөхийн өргөөнд боллоо. Дөрвөн жилд нэг удаа болдог “Их Эе” шөнө дөл болтол хуралдав. Хуралд 200 төлөөлөгч ирэхээс 153 төлөөлөгч мандат авч, оролцсон. Хурлын нийт төлөөлөгчдийн олонхийн саналаар Монголын үндэсний бөхийн холбооны тэргүүнээр дархан аварга, УИХ-ын гишүүн Б.Бат-Эрдэнэ сонгогдлоо. 

Холбооны тэргүүнд дархан аварга Г.Өсөхбаяр, улсын аварга Г.Эрхэмбаяр, улсын заан Ц.Магалжав нарын нэрийг хурлын төлөөлөгчид дэвшүүлсэн ч Б.Бат-Эрдэнээс бусад нь нэрээ татаж, түүнийг 98 хувийн саналаар сонгосон юм. Ийнхүү МҮБХ-г 28 жил удирдсан, Соёлын гавьяат зүтгэлтэн Р.Нямдорж өөрийн хүсэлтээр ажлаа хүлээлгэн өгч, бөхчүүд шинэ тэргүүнтэй болов. 

Т.ЦЭНГЭЛ